افعال تضيع هيبتك و تجرأ زوجتك عليك مع الوقت
مفيش حاجة اسمها واحدة تصحى الصبح و تقرر انها مش هتحترم جوزها و لكن الموضوع بيجى تدريجى مع الوقت و هيبة الزوج و شوكته بتتكسر قدام مراته مع المواقف المتتالية
و دى بعض الافعال الى هتخليها مع الوقت تفقد احترامها ليك
- كثرة الهزار و الضحك(مش مقصود تكون على طول قافش و لكن كتر الضحك و الهزار و القلش بيحولك مهرج و اراجوز و محدش هيعرف يوقر اراجوز)
- التعرض للاهانة امام الزوجة من اطراف اعلى منك زى اخوك الكبير او والدك او والدتك او مدير ليك فى الشغل امام زوجتك و مراتك شايفاك بتتهزأ و ساكت ده بيخليها تتجرأ هى كمان ولا جت عليا انا و عايز تعمل فيها راجل
- الجلوس فترات طويلة بالمنزل (اتكلمت قبل ان حتى لو شغلك من البيت اتصرف و اشتغل برا او اجر مكتب)
- الفرجة على الكارتون(الانمى) شايفاك عيل صغير (هى مش فاهمة بقى ان ده للكبار ولا الكلام ده هى شايفة كارتون و راجل عنده ٣٠ سنة بيتفرج عليه)
- العياط و البكاء قدامها
- الظهور فى مظهر المحتاس المدهول اللى مش عارف حاجة ولا عارف يتصرف
- استشارتها (واحد مش عارف ياخد قرار هيلبس ايه و ياكل ايه يبقى هيسوق البيت ده ازاى)
- الاستئذان منها
- الاهمال فى مظهرك الخارجى و نظافتك الشخصية حتى داخل البيت
- النميمة و افشاء اسرار اهلك و اصدقاءك ليها و تصرفات النسوان عموما لما تبقى طالعة من راجل بتضيع الهيبة
- الالعاب المنزلية زى البلاى ستيشن او حتى فى الخارج تقول لها قاعد بلعب فى البلاى ستيشن ولا على القهوة ولا هنا و لا فى اى حتة انت كده بتدى انطباع انك قاعد صايع لا شغلة ولا مشغلة و طبيعى احترامها ليك هيقل (لذلك و انت رايح اى مكان ما تعرفهاش انت فين ولا بتعمل ايه و ابقى اعمل الى على مزاجك برا من غير ماتعرفها لان هى مش ولية امرك)
- مش عارف ياخد قرار واحد فى حياته من غير ما يرجع لها
- لو بتستشير حد تكون استشارتك فى مكان مغلق بينك و بينه بحيث ان مراتك ما تشوفكش و انت جاهل و مش عارف تتصرف (الاستشارة مش عيب و لكن النساء بيشوفوا ده نقص للاسف) و ما تعرفهاش انك استشرت حد بيشوفوا ده ماشى بشورة امه او شورة صاحبه او شورة فلان او علان هو ببساطة خالص انا قعدت و فكرت و وصلت ان ١ ٢ ٣
و تصرفات تانية كتير تكرارها مع الوقت بيكسر صورة الرجل المهاب و طبيعى هتلاقى مع الوقت قلة ادب و نشوز
ما هى مش شايفة راجل قدامها قد المسؤولية و لكن شايفة طفل كبير مقضيها لعب و صياعة و واخد الامور كلها تهريج فى تهريج و قاعد للساقطة و اللقطة
لذلك واجب تكون حريص فى تصرفاتك و فى كلامك لو عايزها تعاملك باحترام
فالاحترام يفرض ولا يعطى
التسميات
ريدبيل