حقوق المريض

 

. لازم تعرف حقك

اعرف الحقوق دي كويس عشان مفيش حد غيرنا هاينبهك ليها (صدقني)

** عمرك فكرت تعرف ايه هي حقوق المريض

اقرا البنود وافهمها ولو شايف او لك ملاحظه ان فيه بند لاينفذ قولنا ملاحظتك

**اول بند حق أساسي من حقوقك ان لك الحق انك تعرف حقوقك يعني متخافش سيادتك مش بتعمل بدعه او ذنب انك تسأل ايه حقوقك

** طبعاً شارح نفسه انك تاخد خدمه ذات جوده وده بالذات ماتكلمش فيه (شكلك معترض)

** حقك في الخصوصيه الشخصيه والكرامه يعني حقك انك يتم علاجك في مكان يحفظ كرامتك ويأمن وخصوصيتك وان ماحدش يدخل دون استئذان ولايكون جسمك معرض للكشف من قبل اي حد دون استئذان زي مابيحصل في عنبر الولاده في بعض المستشفيات او يتم اقتحام خصوصيتك من قبل الطلبه في المستشفيات الجامعيه

كون ان حضرتك لا تطالب بحقك دي غلطتك

(تصلنا شكاوي كثيره بسبب الاخلال بهذا الحق)

** تلتزم المستشفي بتقديم الرعايه الطبيه التي تحترم قيم ومعتقدات المريض الشخصيه والدينيه وده بقي اهم بند علي الإطلاق والبند ده استخدمته امرأه مسلمه بإستراليا مستشهده بأن طبقاً لعقيدتها الدينيه ان الاصل في العلاج من نفس الجنس ورفعت دعوي وتم تغيير كل الإجرءات في المستشفيات بإستراليا للإستجابه الفوريه للمريضه اذا طلبت طاقم طبي نساء فقط وده كمان نفس البند اللي احنا استخدمناه في قضيتنا وكمان حضرتك لك نفس الحق تطالب بتعديل مايخالف عقيدتك الشخصيه والدينيه

**من حقك تعرف اسم الدكتور المعالج والمساعدين وتسمياتهم الوظيفيه عشان لو احتجت استفسار او متابعه او لو عاوز تقدم شكوي ماتدوخش عشان تعرف اسمه ويضيع حقك عشان حضرتك مش عارف توصل لحاجه

**حقك تعرف مرضك وطرق وبدائل علاجك إذا كان بالادويه او منظار او جراحه وطبعا حضرتك يكون لك رأي في الإختيار

**حقك تعرف حالتك الصحيه ايه بإستخدام الفاظ واضحه ومفهومه مش مجرد كلمات مبهمه ويلا مع السلامه ومفيش شرح ،، وكمان حقك تسأل لو مش فاهم ويتم الاجابه عن اسألتك عشان تفهم

**تعرف القرارات الخاصه بعلاجك ومن حقك رفضها او تعديلها حسب احتياجاتك او قدراتك وطبعاً حقك انك توافق مسبقا قبل اي طريقه لفحصك وعلاجك

**حقك ترفض اي ابحاث او دراسات تتعمل عليك او اي تدريب او وضع انت مش راضي عنه ولك حق الشكوي اذا تم اجبارك او مفاجأتك ولم يتم اخبارك مسبقاً

**حقك ترفض الرعايه الطبيه بالكامل وترفض انك تكمل العلاج من اساسه

**حق مهم لك ان يتم الاهتمام بشكوتك او اقتراحك ويتم الرد عليهم

ملحوظة؛ حضرتك مسئول انك تعرف حقوقك والمطالبه بها ومخاطبة المسئولين اذا لزم وكونك بتتنازل دي مشكلتك انت

#مستشفي_للنساء_فقط