مذكرات معتقل سياسي - الجزء الثالث

مذكرات معتقل سياسي. (3)

التحقيق في أمن الدولة لم يستمر إلا 45 دقيقة تقريباً، ويبدو أن المحقق اكتشف إني مش خطر على الأمن القومي، ومافيش داعي يحتجزني عنده. لقيت العسكري جاي ياخدني وننزل تاني على البوكس. مشينا شوية ورفعوا الغمامة عن عيني، فتخيلت إنهم كرماء لدرجة توصيلي لحد البيت، بس لقيتهم واخديني على نيابة الهرم في أكتوبر.

نزلنا ودخلنا، لقينا وكيل النيابة ها يخرج، والحرس بيستعد يروح لأننا كنا يوم العيد. لما دخلت، اتأجل الخروج ودخلت على وكيل نيابة شاب في حدود الثلاثين، مهذب وبيتعامل بأسلوب لطيف، والأهم أن المكتب مكيف. قال لي: "اتفضل"، قدم لي سيجارة، ولعت. سألني: "تشرب إيه؟" طلبت قهوة سادة، وحط علبة سجاير مارلبورو قدامي. أنا مدخن شره في الحقيقة، وابتدى الراجل يكلمني في أمور عامة ويوريني إنه مثقف، وده اللي كنت محتاجه، محقق يفهم أنا بقول إيه.

بس لقيته بيحاول يستدرجني في الكلام، وهو ولا هما مايعرفوش إني مش محتاج استدراج لأني ما عنديش أصلاً. مابنكرش إن ذنوبي وأخطائي وخطاياي كالجبال، بس حتى الخطيئة بممارسها بالأصول، يعني ما عنديش اللي أخاف إنه ينكشف. وانطلقت معاه في الكلام زي ما هو عايز..

سألني عن علاقتي مع أربعة من المفكرين: نجيب محفوظ، وإمام عبد الفتاح، وطارق حجي، وسيد القمني. حكيت له ازاي اتعرفت عليهم وقربنا من بعض، وهو كان بيحاول يؤكد لي إنه مثقف هو كمان بدليل إنه بيقرأ للدكتور مصطفى محمود. ما علقتش، لأن لو قلت له إني بحتقر مصطفى محمود واللي بيقرا له، كان هيزعل.

بس علق تعليق سخيف على المفكرين الأربعة: "طبعاً دول ملحدين؟" قلت له: "الحقيقة هما ليهم رب مختلف شوية عن باقي الناس، ربهم أكثر عظمة وعبقرية وإبداع؛ هما بيعبدوا العبقرية الكونية أيا كان مصدرها." ما فهمش حاجة، قال لي: "يعني ملحدين؟" قلت له: "ماشي".

القعدة طالت، ودخلنا في التاريخ والدين والسياسة، وأنا بحكي وهو بيكتب كلامي. كان الكاتب مسيحي لطيف ومهذب، ووكيل النيابة ابن ناس وكريم، طلب لي ألف شاي وقهوة وساقع وعصير ومياه، ولما ملقاش محلات للأكل مفتوحة، طلب لي باتيهات وشيبسي وشيكولاتة وبسكويت، وفتح لي الحمام الخاص بتاعه. ولما خلصت علبة السجاير المارلبورو، بعت جاب لي علبة تانية، يعني تقريباً خربت بيته في اليوم ده..

التحقيق استمر 12 ساعة متواصلة، من 12 الظهر لحد نص الليل تقريباً، وكان مهتم جداً بفيديو ليا على اليوتيوب تحت عنوان: "أشرف خلق الله... ليه؟" والفيديو مش إلحادي ولا حتى فيه دعوة للازدراء؛ أنا بس بسأل ليه رب العزة أعطى للنبي محمد وظيفة أشرف الخلق على الإطلاق، وقلت أنا مش بنكر الوظيفة، حاشا لله، أنا بس بتساءل عن مقومات شغل هذه الوظيفة حتى نربي أبنائنا على هذه المقومات.

وفي نص الفيديو بقول: "أنا فعلاً مؤمن صوفي عاشق للذات الإلهية وبحتقر الإلحاد والملحدين." يعني تقدر تقول إنه فيديو يليق بالشعراوي أو بن باز، ورغم كده إلا إنهم شايفينه إلحادي بدون مبرر. بس لاحظت إن التركيز كله كان عن هجومى العنيف على السيسي سنة 2017 بعد بيع تيران وصنافير. وده بسبب إني فلاح عندي الأرض هي العرض، وبيعها للغريب خيانة وطنية لا تغتفر، واستفزني أكتر منظر المصريين والمصريات اللي رقصوا في الشوارع، والست اللي بتقول: "وإيه يعني؟ ما ياخدوا تيران وصنافير ونديهم كمان أبو الهول وأم الهول".

الأحقر كان رفع علم السعودية في مجلس الشعب وتهليل النواب لحق السعودية في الجزر المصرية، لنصبح أول شعب في التاريخ يرقص فرحاً لضياع أرضه. وهنا فعلاً هاجمت السيسي بكل قسوة وبكل ما في قاموسي من احتقار، خصوصاً إني رحت تيران وعملت دايفنج فيها، وليها ذكرى جميلة في قلبي. وإذا كنتم لازم تحاكموني، يبقى اتحاكم بتهمة الدفاع عن الأرض والعرض، مش بتهم ثانية مطاطة. كل اللي واجهني به السيد وكيل النيابة اعترفت به، لأن لو شايف إني غلط ما كنتش كتبت.

أنا عاشق للمحروسة، متحفظ على موقف رئيس الجمهورية في بيع تيران وصنافير للبدو، وده قرار المحكمة الدستورية العليا، ومتحفظ على أسلوب الدولة في التعامل مع سد الخراب في إثيوبيا. غير كده، أنا مع الرئيس وضد الإخوان والسلفيين والعثمانلية كمان. في الدين، أنا راجل صوفي بعشق الذات الإلهية بكافة تجلياتها في شاعرية القرآن المكي، في جمال عظة الجبل، في روحانية الرهبان في صلاة منتصف الليل، في أي مكان بلاقي فيه ربنا، وبحتقر مو الإلحاد والملحدين، لأنهم عديمي الفكر ومدعين مش أكتر.

أعدائي على مستوى الفكر كتير، اللي بيقبض عشان يقف في صف فريق، اللي بيقبل تمويل خارجي ويقف ضد مصلحة البلد، اللي بيقول في السر غير ما بيقول في العلن، اللي بينادوا بفكر مضاد للنخوة والرجولة والشرف؛ يعني أعدائي أعداء للوطن مش أعداء شخصيين.

خلص التحقيق وخرج السيد وكيل النيابة يتكلم في التليفون، ورجع يقولي: "مضطر أحجزك 4 أيام على ذمة التحقيق." ومضيت على المحضر من غير ما أقراه، ونزلت تاني على البوكس في طريقي لقسم الهرم..

يُتبع..