![](https://blogger.googleusercontent.com/img/b/R29vZ2xl/AVvXsEiNdBsKdNAi0CsDLQQ4BXLdyevyTKZmP1q-4hvbqHatlylX1-rs-n3odAkazQO3zWUbrhcJPjTqhCFbKaqn8CYQ8syJMyizZg36ym_L3obw4fjkdsSfyIfCmi9vNUJgKoOZLah0X9mY5B_jT-RiuRQR6TPCZoyf6DjpGOhVImTc9x852FNguINH3QsWPZX4/s16000/435778641_7285602481522706_4753413036709395694_n.jpg)
10 قواعد في معركة الفقر.. كيف تبيع نفسك في سوق العمل والمجتمع ؟
■ رامز جلال في آخر حلقة لما حب يعيد بعض الحلقات جاب حلقة كزبرة وحمو بيكا.
ده معناه إيه ببساطة؟ إن الحلقة دي جابت مشاهدات عالية وطلعت تريند على النت فبيعيدها للناس.
ده برضه معناه إيه؟ إن الشخصيات دي بتبيع كويس والناس بتحبها.
أغنية كزبرة الأخيرة جايبة ٩ مليون مشاهدة على يوتيوب والقناة كلها جايبة ٨٨ مليون مشاهدة.
قناة حمو بيكا على اليوتيوب جايبة ٧٣١ مليون مشاهدة.
فيلم الحريفة اللي هو بطولة شباب صغير منهم كزبرة إيراداته أكتر من ٧٢ مليون جنيه داخل مصر.
يبقى المعامل الأول بيقول إن الناس دي عندها القدرة على بيع نفسها، وليها جمهور بيستني إنتاجهم وبيحبهم (١).
■ في كام واحد في مصر زي حمو بيكا وكزبرة؟
١٠٠٠ مثلاً، طب كام واحد منهم مشهور؟ ١٠٠ مثلاً؟
في كام واحد بيتخرج من كلية تجارة كل سنة؟ ١٠٠٠٠؟ كام واحد منهم شاطر في تخصصه وهيغير واقع الشركة اللي هيشتغل فيها؟ أقل من ١٠٠.
ده ببساطة اسمه قانون الندرة. أنت في منك كام؟ وسعر قوة عملك في السوق كام لو كنت محترف جداً؟
المعامل هنا هو إن كل ما كان إلي شبهك قليل هتبيع أكتر (٢).
■ في كام مدرس مليونير في مصر؟
كام دكتور كشفه في دقيقتين ألف جنيه وبيكشف على ٥٠ في اليوم؟
كام محامي بياخد في القضية مئات الآلاف؟
في كام مطرب شعبي مغمور، بيغني في الأفراح بـ ٢٠٠٠ جنيه؟
كتير جداً على فكرة، فبالتالي مينفعش تقارن واحد في قمة مجاله بناس لسه في أول الطريق في مجالها.
قارن محترف بمحترف هتكتشف إن طريق العمل الاحترافي بيكسب أكتر بكتير ومضمون أكتر من مغامرة الشهرة.
ده المعامل التالت (٣).
■ صناعة الترفيه والقضاء على الملل هي أغنى الصناعات في العالم، عشان العميل نفسه عايز يدفع في ده عشان يواجه مصاعب الحياة والمآسي في العالم.
يعني في كل حتة في العالم، الممثل أو المطرب بيكسب أكتر، لأن العملاء بيدفعوا في الصناعة دي كتير.
ده ببساطة قانون السوق، ده المعامل الرابع (٤).
■ استحقاق الطبقة المتوسطة وطموحها في العالم غريب جداً، هو شايف بما إنه عنده قيم محددة ودخل سلك التعليم للآخر، فبالتالي من حقه يكسب أكتر أو يشوف تقدير من المجتمع.
المجتمع أو العملاء مش هيدوك الكريديت اللي أنت عايزه إلا لو أنت مؤثر في مصلحتهم بصورة مباشرة.
يعني مهما كنت عالم الناس مش هتقدرك إلا لو فهموا أنت هتفيدهم بإيه.
الناس مش مهتمة بيك مهتمة بنفسها، ده المعامل الخامس (٥).
■ التعليم النظامي مبقاش الوسيلة الوحيدة للصعود الاجتماعي زي الأول، بقى في وسائل تانية كتير.
لكن لو عايز تصعد اجتماعياً من خلال التعليم،
لازم تكون مختلف عن الآخرين ومحترف في مجالك مش مجرد معاك بكالوريوس مثلاً، لا، أنت محتاج تعليم ذاتي قوي وسنين من الكفاح والمجهود عشان تساوي الخريج اللي زيك في العالم الأول.
إتقانك للعلم واحترافيتك هي اللي هتحدد سعرك، ده المعامل السادس (٦).
■ اللطم والعويل والمظلوميات والتحسر على الزمن الغابر وعلى القيم والأخلاق المهدرة مش هيغير الواقع بتاعك.
مش كل الناس عندها نفس أفكارك أو محاذيرك، ومحدش مسؤول عن تغيير واقعك السيء غيرك أنت، ده المعامل السابع (٧).
■ معركة الفقر هي معركة مهمة جداً في حياة الإنسان.
عندنا عيال قدرت تخرج من أسر وأغلال الفقر بطريقة ما.
الطريقة دي أنت شايفها ملوثة وبتضر المجتمع.
حقك تنتقدها طبعاً.
لكن لازم تبقى فاهم أنت هتعمل إيه في معركة الفقر بتاعتك؟ هل اختياراتك هتقدر تعديها ولا لا؟
هتقولي ما الأسفاف بيكسب أكتر وأنا راجل شريف.
حلو، هل في ناس شرفاء زيك كسروا قيد الفقر ولا لا؟ أعمل زيهم.
معركة الفقر، ده المعامل الثامن (٨).
■ مفروض المجال اللي أنت بتمتهنه تكون بتحبه وعندك رسالة فيه، ومينفعش أي فلوس في مجال آخر تغريك.
ده المعامل التاسع (٩).
■ السوق والعميل المستهدف.
الناس مش زي بعضها، العملاء مليارات في العالم عندهم مليارات الاحتياجات ووجهات النظر.
السوق وقواعده بتتغير كل يوم وكل جيل مختلف عن اللي قابله.
دور على سوقك وعلى عميلك المستهدف اللي هيشتري بضاعتك، هتلاقيه بسهولة.
مش لازم تبص على سوق وجمهور مش بتاعك.
ده المعامل العاشر (١٠).
🚨 تلك عشرة كاملة.
》》 ده تفسير عقلاني محايد عن الظواهر زي دي، بالطبع مفهوش دفاع أو حتى هجوم عليهم، لكن محاولة لفهم قواعد السوق الجديدة.
#بس_بنقول